भंडारा दि.३१,
लाखांदूर : शेतावर गेलेल्या शेतकऱ्यावर दबा धरून बसलेल्या वाघाने हल्ला करून ठार केले. ही घटना लाखांदूर तालुक्यातील खैरी पट गावातील शेतशिवरात रविवारी (३० मार्च) रात्रीच्या सुमारास घडली. डाकराम देशमुख (४३) असे मृत शेतकऱ्याचे नाव आहे. या घटनेनंतर गावकरी संतप्त झाले होते.
मागील १५ ते २० दिवसांपासून लाखांदूर तालुक्यातील खैरी/पट, विहीरगाव, डांभेविरली व टेंभरी या परिसरात वाघाचे भ्रमण होत असून अनेक जनावरांची शिकार झाली आहे. रविवार (३० मार्च) खैरी/पट येथील शेतकरी डाकराम देशमुख स्वतःच्या शेतावर मोटार पंपाचे पाईप बदलवण्यासाठी सायंकाळी ५ वाजेच्या सुमारास गेले होते. मात्र दबा धरून बसलेल्या वाघाने डाकरामवर हल्ला करून ३५ ते ४० फूट अंतरावर मक्याच्या शेतात ओढत नेले. रात्री उशिरापर्यंत ते घरी परतले नाही. त्यामुळे कुटुंबीयांनी शोधाशोध सुरू केली. अखेर डाकराम बेपत्ता झाल्याची तक्रार पोलीस ठाण्यात करण्यात आली.
मध्यराञीच्या सुमारास लाखांदूर वनपरीक्षेञ अधिकारी कार्यालयाची चमु व पोलीस प्रशासन यांनी डाकराम देशमुख यांचे शोधकार्य सुरू केले. शेतात डाकराम यांची सायकल दिसल्यानंतर खैरी पट स्मशानभूमी येथे त्यांचा मृतदेह अर्धवट खाल्लेल्या अवस्थेत आढळला. वाघाने हल्ला करून त्यांना ठार केल्याचे लक्षात आले. यानंतर शवविच्छेदनासाठी डाकराम यांचा मृतदेह आणण्यात आला.
वन विभाग कार्यालयाच्या समोर शेकडो गावकऱ्यांनी गर्दी केली होती. अशातच लाखांदूर पोलीस स्टेशनचे पोलीस निरीक्षक सचिन पवार यांच्या मार्गदर्शनात पोलीस विभाग व वन विभागाच्या कर्मचाऱ्यांनी नागरिकांना शांत केले. यावेळी वन विभागाकडून देशमुख कुटुंबाला ५० हजारांची आर्थिक मदत करण्यात आली.
