दुचाकी स्वाराचा घटनास्थळी मृत्यू ,१२ प्रवासी किरकोळ जखमी; गडचांदूर-कोरपना मार्गावरील घटना..
शब्दसंदेश न्यूज नेटवर्क,
चंद्रपूर, दि.१९ डिसेंबर २०२४
चंद्रपूर जिल्ह्यातील राजूरा ते गोविंदपुर या राष्ट्रीय महामार्गावर आज दि.१८ डिसेंबर रोजी दुपारी १२:०० वाजे दरम्यान, राज्य परिवहन महामंडळाची बस व दुचाकीच्या अपघातात दुचाकी चालकाचा घटनास्थळीच मृत्यू झाला. तर, बस चालकासह बस मधील १२ प्रवासी किरकोळ जखमी झाले आहे.
आज बुधवारी सकाळी किनवट आगाराची बस क्रं.एम.एच.१४ बी.टी.१९४१ चंद्रपूरकडून कोरपना गडचांदूर मार्गावरून जात असताना, बस समोर अचानक दुचाकी आल्याने बस चालकाने दुचाकी स्वाराला वाचविण्यासाठी प्रयत्न केला असता, बसचे नियंत्रण सुटले आणि दुचाकीला धडक देत बस डिव्हायडरवरून रस्त्याच्या खाली उतरली. या अपघातात दुचाकी चालक गडचांदूर निवासी कानोजी दमाले (५५) याचा जागीच मृत्यू झाला.
बस मधील १२ प्रवासी किरकोळ जखमी झाली असून, बस चालक सुधाकर सलाम (४६) राह.घाटंजी यवतमाळ यांना अपघातात गंभीर दुखापत झाली असून, त्याच्यावर गडचांदूर येथे प्राथमिक उपचार करण्यात आले. घटनेची माहिती मिळताच, गडचांदूर पोलीस घटनास्थळी दाखल झाले. जखमी प्रवासी व बस चालकाला ग्रामीण रुग्णालयात उपचाराकरता दाखल करण्यात आले.
