देवरी पोलिसात गुन्हा दाखल..
शब्दसंदेश न्यूज नेटवर्क,
देवरी, दि.१३ डिसेंबर २०२४
एक ट्रक भाड्याने घेऊन त्या ट्रकमध्ये ३५ टन सुपारी टाकून ती सुपारी आसाम येथून राष्ट्रीय महामार्गाने मुंबई येथे नेत असताना, तो ट्रक देवरी पोलीस ठाण्याच्या हद्दीत आल्यानंतर गायब झाला. ही घटना ११ नोव्हेंबर रोजी दुपारी उघडकीस आली.या प्रकरणी तक्रारीवरून देवरी पोलिसांनी गुन्हा नोंद केला आहे.
आसामच्या कच्छहार जिल्ह्यातील वार्ड क्र. १२ पब्लिक स्कूल रोड सिलचर येथील ओमप्रकाश राजकुमार दुबे (३९) यांनी दिलेल्या तक्रारीनुसार, त्यांची ट्रान्सपोर्ट कंपनी आहे शुभम ट्रेडिंग कंपनीची ३५ टन सुपारी आसाम येथून वाशी मुंबई येथे पाठवायची होती. त्यासाठी ट्रक क्र. सी.जी.०८ ए.व्ही.७८५८ भाडे तत्त्वावर घेऊन त्यात ३५ टन सुपारी टाकून आसामवरून मुंबई नेत असताना, तो ट्रक ११ नोव्हेंबर रोजी दुपारी एक वाजता सीमा तपासणी नाका शिरपूर देवरी येथे आला. परंतु, तो ट्रक पुढे गेलाच नाही.
त्या ट्रक मध्ये ५२ लाख ३६ हजार ८७५ रुपयाची सुपारी होती. देवरीच्या शिरपूर येथील सीमा तपासणी नाका परिसरातून ११ नोव्हेंबर रोजी दुपारी एक वाजता सुपारीचा ट्रक गायब झाला. या ट्रकचा चालक दिनशहा अली इरसाद अली (३४) रा. मतीया इमाली दंड लचिपुर ता. राणीगंज जि. प्रतापगड (उत्तर प्रदेश) ट्रक मालक राजभूषण मनोहर वैद्य(३९) रा. कनेरी ता. सडक अर्जुनी हे दोघेही ट्रक मधील प्रतिष्ठान सुपारी घेऊन पसार झाले.
राजभूषण वैद्य यांचा फोन बंद येत आहे. ओमप्रकाश दुबे यांची फसवणूक करणाऱ्या आरोपीवर देवरी पोलिसांनी भारतीय न्याय संहिता कलम ३१६(३)३(५) अनन्य गुन्हा दाखल केला आहे. तपास सहायक पोलीस निरीक्षक मुकुंद जाधव करीत आहेत.
